ನಿನ್ನ ಕಣ್ಣ ಬಗೆಗಿನ ಮಾತು

ನಿನ್ನ ಕಣ್ಣಲ್ಲಿ ಏನಿಲ್ಲ ಹೇಳು 

ಆಗಾಧ ಸಾಗರವಿದೆ,

ಅದರೊಡಲಿನ ಪುಟ್ಟ ಹಸಿರು ಮೀನಿದೆ

ಮೀನ ರೆಕ್ಕೆಯ ಚಲನವಿದೆ

ಭುವಿಯಿಂದ ಬಾನಿಗೆ ಬಾಗಿದ

ಮಳೆಬಿಲ್ಲಿದೆ ನಿನ್ನ ಕಣ್ಣಲಿ,

ಮೋಡದ ಹನಿಮಳೆಯಿದೆ

ಒದ್ದೆ ಮಳೆಯ ಉಸಿರಿದೆ

ಗಿಡದ ಹಸಿರಿದೆ

ಮೊದಲ ಮಳೆಯ ಮಣ್ಣ ಕಂಪಿದೆ  

ನನ್ನ ಕನಸಿನ ನಾಳೆಗಳಿವೆ

ನಿನ್ನ ಕಣ್ಣಲಿ,

ನೂರು ಬಾರಿ ಹೇಳಬೇಕೆನಿಸುವ

ನನ್ನದೇ ಭಾಷೆಯ ಎರಡು ಪದಗಳಿವೆ 

ರಭಸದಿ ಹರಿವ ನದಿಯ ಅವಸರವಿದೆ,

ಸಣ್ಣ ತೊರೆಯ ನೀರವತೆಯಿದೆ

ನನ್ನ ನಿರಂತರ ಮಾತಿದೆ

ಎಲ್ಲ ಹೇಳುವ ನಿನ್ನ ಮೌನದ ದನಿಯಿದೆ

ನೂರು ಹೂವರಳಿದ ನಗುವಿದೆ

ನಿಂದೆ ಕೈಬಳೆಯ ಘನನವಿದೆ

ನನ್ನ ಉಸಿರು ಹೆಚ್ಚಿದ ಕ್ಷಣಗಳಿವೆ

ನಿನ್ನ ಒದ್ದೆ ಕೂದಲಿನ ಸಡಿಲ ಹಿಡಿತವಿದೆ

ನಿಚ್ಚಳ ಆಗಸದಂತ 

ಸೆಳೆವ ನಿನ್ನ ಕಣ್ಣುಗಳಲ್ಲಿ 

ನನ್ನೆದೆಯ ಚಡಪಡಿಕೆಯಿದೆ,

ಅದರೊಳಗಿನ ಕನವರಿಕೆಯಿದೆ

ನಿನ್ನೆಡೆಗೆ ನನ್ನನೆಳೆವ 

ಆ ನಿರಂತರ ಸೆಳಕಿದೆ