ವರ್ತಮಾನ ಚೌಕಟ್ಟಿನಾಚೆ ಹರಡತೊಡಗಿದೆ

ನೆಲಕೆ ಸುರಿದ ಬೆವರೆ

ಹಕ್ಕಿ ಗೂಡಾಗಿ

ಹಸಿದ ಹೊಟ್ಟೆಗೆ- ಒಂಟಿ ಮರಿಗೆ 

ಜೀವ ತುಂಬಿ

ಬೆಳಕೆ ಬಾಯ್ದೆರೆದು

ಕವಲೊಡೆದು ಗೆರೆಯಾಗಿ 

ಚಿತ್ತಾರದ ಮರವಾಗಿ  

ಬಣ್ಣದೋಕುಳಿಯಲಿ ಹೂವಾಗಿದೆ

ಎಷ್ಟೋ ರೇಖೆಗಳ ನಡುವೆ

ಹೂವಿನ ಗೀತೆ ಹುಟ್ಟಿ 

ಒಂದು ಒಲವಿನ  ದನಿಯು 

ನೆಲದ ಪುಳಕವಾಗಿ

ಗುಬ್ಬಿಗೂಡನರಸುತ್ತ ನಡೆದಿದೆ

ಆಗಸದ ಮೋಡವು

ಕಡಲ ದಡಕೆ

ಅಲೆಯಾಗಿ ಹರಿದಿದೆ

ಹಗಲಿನಂಥ ಕನಸು

ಮನಸಿನೊಳಗೆ ಸುಳಿದು

ಧ್ಯಾನವಾಗಿ ಸಮಾಧಾನದ

ಹನಿಮಳೆ

ಸುಮ್ಮನೆ ತೋಯಿಸುತ್ತ ನಡೆದಿದೆ

ಲಿಪಿಯಿಲ್ಲದ ಭಾವನೆಯೊಂದು

ಭಾಷಾಂತರಗೊಂಡು

ಜಾತಿ-ವಿಜಾತಿಯ ಊರನೆಲ್ಲ  

ಅಳಿಸುತ್ತ ನಡೆದಿದೆ

ಬ್ಲ್ಯಾಕೆಂಡ್ ವೈಟ್ ಚಿತ್ರ

ಹೊಸದೇ ಬಣ್ಣಗಳನು ಹೇಳುತ

ಚೌಕಟ್ಟಿನಾಚೆಗೆ ಹರಡಿದೆ 

ಮತ್ತು

ಜಂಗಮದ ಜಾಡಿನಲ್ಲಿ ವರ್ತಮಾನ

-ವಷ್ಟೇ ಉಳಿದು

ಇತಿಹಾಸ  ಅಸಂಬದ್ಧವಾಗಿದೆ.